Arbizura iritsi dira ikasle ibiltariak

Gaur goizean behe-lainoarekin esnatu arren Urbasa jaisteari ekin diote martxalariek. Bakaikura iristerakoan, bertako elkartean kafe bero bat hartu ondoren EHNE sindikatuaren eta Akuilu baserritar gazteen elkartearen hitzaldia entzuteko aukera izan dute. Gaia subirautza alimentarioa izan da eta gaur egungo baserritarren egoeraz eta honek dakarren elikagaien gaineko merkantilizazio basatiaz aritu dira. Ondoren Bakaikun burutu zen Europako Ikasle Foroaren inguruko hitzaldia entzun ahal izan dute. Orain Arbizura iritsi dira ikasle ibiltariak. Merezitako dutxaren ondoren, aldarrikapenez betetako kalejira koloretsu bat burutuko dute herriko kaleetan zehar.

Atzo gauean, Santa Marina (Urbasa) aterpetxean lo egin zuten ikasle ibiltariek. Behe-laino ugari zegoenez konfiantza jolasak ezin izan zituzten burutu, baina gitarra hartu eta gaubela polita antolatu zuten.

Gaur goizean behelainoa zegoen oraindik, baina gosariak indarberrituta, eta Bakaikuko lagun baten laguntzaz Urbasatik atera egin dira. Bakaikura iristerakoan poz-pozik zeuden ikasle ibiltariak, eta merezitako kafetxo bero-beroa hartu dute. Honen ondoren, subirautza alimentarioaren inguruko hitzaldia entzun dute, eta baserritar gazte bi hurbildu dira gaiaz hitz egiteko. Bazkaldu ondoren, Bakaikun berriro Europako Ikasle Foroaren inguruko hitzaldia entzun ahal izan dute. Bertan, duela lau urte herri honetan bertan burutu zen Foroaz, eta hortik eratorritako nazioarteko harremanaz mintzatu dira. Argazki esposaketa baten bidez jarraitu ahal izan dute hitzaldia.

Arbizurantz abiatu dira ikasle ibiltariak bi hitzaldiak pasatakoan eta bertara iritsi dira 18:00ak inguruan. Honen ondoren dutxa bero bat hartzeko aukera izan dute, eta orain momentuan kalejirarako prestatzen ari dira. Ondoren afaria eta jaialdiaz disfrutatzeko aukera izango dute.

Honetaz gain, ikasle eta abertzaleok gogoan izan nahi ditugu azken aste hauetan atxilotutako kideak eta batez ere Leioako ikasle diren Ibai, Eneko eta Gillen. Gurekin nahi ditugu!

2. eguna

Urbasan barna ibili dira ikasle ibiltariak

Aranaratxen gaua pasa ondoren, Urbasako paraje ederretan barneratu dira martxalariak. Gaurkoan, Nafarroa 1512-2012 plataformaren eskutik hitzaldi bat jaso dute. Euskal Natura ikasle elkarteko kide eta beste ikasle batzuen eskutik Urbasako fauna, flora, klima eta geologiari buruzko eskola ibiltari bat jasotzen ari dira momentuan.

Atzo gauean, ikasle ibiltariak Aranaratxera heldu ziren. Bertan, afariaren zain zeuden bitartean, konfiantza jolas desberdinak burutu zituzten, haien arteko harremanak estutzen joateko. Afaldu ondoren, kosetxa radiaktiba taldearen kontzertuaz gozatu zuten. Giro paregabea sortu zuen taldeak, eta amaitutakoan eskola ibiltariko kide desberdinak gitarra eta kaxa hartzera animatu ziren. Elizpe batean egin zuten lo bertaratutakoek.

Gaur goizean, Aranaratxen gosaria hartu ondoren, Urbasarantz abiatu dira. Paisai ederraz gozatzeko aukera izan dute eguraldiak asko lagundu baititu bide osoan zehar. Hala ere itzalpe batzuk topatu behar izan dituzte bero handiaz pixka bat ezkutatzeko. Eguerdian, Nafarroa 1512-2012 plataformaren eskutik Nafarroaren egoera historikoaz aritu dira. Gaur egun Euskal Herria, baina garaian Nafarroako erreinuaren azalpen historikoaren bidez kokapen garaikide bat eskaini dute hizlariek. Kide guztiek gogoz jaso dituzte azalpen guztiak eta haien kezkak eta galderak plazaratzeko aukera izan dute. Giro paregabean burutu dute bigarren eguneko lehen eskola hau.

Atsedenalditxoaren ondoren, martxa berrabiarazi dute, eta Urbasan barneratuz joan dira. Momentuan, Euskal Naturako kideen eta baita eskola ibiltarian bertan dauden beste ikasle batzuen eskutik Urbasako inguruetako fauna, flora, geologia eta klimari buruzko eskola ibiltari bat burutzen ari dira. Gaur gauean, izar eskola jasoko dute ikasle ibiltariek.

Bihar eskola ibiltariaren azken eguna izango da, eta afari herrikoiaren ondoren jai giroan agur esango diote aurtengo eskola ibiltariari. Gogoratu oraindik aukera daukazuela afari honetan parte hartu nahi baldin baduzue eskolaibiltaria@ikasleabertzaleak.org era email bat bidaliz. 7 euroren truke afari goxoa eta giro paregabeaz gozatzeko aukera izango duzue. Parte hartu!

35 ikasle ibiltariek hasi dute lehen etapa, Lizarratik Eulatera eramango dituena. Gaur goiz osoan zehar Lizarran izan ostean, Viloriara abiatu dira autobuses. Bertan azken ikazkinetako baten hitzaldian egon ondoren Eulaterainoko etapa hasi dute Urbasan zehar barneratuz. Oraingoz eguraldia lagun dute, baina gauerako ekaitza iragarrita dagoela eta, pilotaleku batean lo egingo dute. Hala ere umorez eta alai hasi dute lehen eguna.

Eguerdiko 12etan izan da harrera ekitaldia, eta bertaratutako 35 ikasle ibiltariek ongi etorria eta haien asteburuearen berri jaso ostean lehen hitzaldira abiatu dira. Lizarrako abekltzain bat, artzai bat eta nekazaritza ekologikoa lantzen dituen lagun bat izan dituzte mintzakide. Hauek, Lizarrako nekazal egoeraz mintzatu zaizkie bertaratutakoei. Eskualdearen arabera egokitutako nekazaritza eta abeltzantza baten beharraz hitz egin diete.
Hitzaldi honen ondoren, bazkari garaian ezagutza jolasak burutu dituzte. Euskal Herriko txoko desberdinetatik bertaratutako kideek, hobeto ezagutzeko aukera izan dute.

Bazkariaren ostean autobusean abiatu dira guztiak Viloriara. Bertan, Euskal Herrian geratzen den azken ikazkinetako baten eskutik, txondorrak nola egiten diren ikasi dute. Ikazkin honek, gaur egun, haren lanbidearen bidez bizirautea oso zaila dela adierazi die. Interes askorekin entzun dituzte ikasle ibiltariek haien hitzak.

Hitzaldia amaitutakoan ibilaldiari hasiera eman diete. Vilorian hasi eta Eulatera bidean dira orain. Urbasako paraje ederrak ezagutuz iritsiko dira bertaraino. Gauean, afari indarberritzaile baten ondoren, Lizarratik etorritako ikasle ibiltari batzuen eskutik izango dute kantaldia. Bihar Urbasan zehar ibiliko dira egun osoan zehar.

Jada 30 pertsona inguruk eman du izena Eskola Ibiltarian. Orain pare bat aste hasi zen Eskola Ibiltarian izena emateko matrikulazioa, eta ordutik 30 pertsona inguruk eman dute izena bertan. Oraindik ere, badago horretarako aukera ikasleabertzaleak.org/eskolaibiltaria09 helbidean, baina horrez gain, Eskola Ibiltarira hiru egunetarako joan ezin direnentzat ere prestatu du Ikasle Abertzaleakek eskaintza berezi bat.

Azken egunean egin ohi den afarian parte hartzeko aukera eskaini nahi diete ikasle abertzaleek, lehenago joan ezin dutenei. Uztailaren 4an, larunbatean arratsalde partean  iritsiko dira Arbizura ibilaldian parte hartutakoak eta dutxatu eta lo lekuan gauzak utzi ostean, aldarrikapenez jositako kalejira-poteoa egingo dute Arbizun zehar. Ondoren ekitaldi politikoa izango da, eta afaria gero. Afalostean, kontzertu sorpresak izango dira Arbizuko gazte lokalean eta gau osoan luzatu daitekeen parranda.

Ikasle Abertzaleak-ek gonbidapena luzatu die Euskal Herriko gazte eta horren gazte ez diren denei, hiru egunetarako ez bada ere, azken afarian eurekin izateko. Afaltzera gerturatzeko asmoa dutenei, lehenago eskolaibiltaria@ikasleabertzaleak.org helbidera mezu bat bidaltzeko eskaera ere luzatu diete, horrela aurrez kalkuluak hobeto egiteko.

Orain aste batzuk esan genuen moduan, aurtengo Eskola Ibiltaria, uztailaren 2,3 eta 4 egunetan izango da, hasi Lizarratik eta Arbizura arte.

Bada, gaur jarri dugu martxan Eskola Ibiltarian izena emateko matrikulazioa. Izena emateko, ikasleabertzaleak.org/eskolaibiltaria09 orrialdean sartu eta datuak ematearekin nahikoa izango da. Eta bonoak balio dituen 20 euroak, Eskola Ibiltariko lehenengo egunean, Lizarran bertan ordainduko dira.

Eskola Ibiltarira etortzeko asmoa duen orori , izena emateko eskatzen diogu, azpiegitura beharrei ganoraz erantzuteko, zenbat pertsona egongo garen jakitea komeni zaigu eta.

Aurtengoan Lizarra eta Arbizu artean izango da uztailaren lehen astean eta lurraren ustiapena izango da ekimenaren gai zentrala, honek ingurugiroan, gazteongan eta lurralde antolamenduan duen eragina aztertuz.

Zer da Eskola Ibiltaria?

Beste kurtso bat pasa da euskal ikasleontzat; kurtso bat, non euskal ikasleoi berriro ere gure eskubideak urratu dizkiguten. Euskal Herriko ikastetxe eta fakultateetan eduki arrotzak irakasten dizkigute, azterketa sistema atzerakoiaren bidez kontrolatzen gaituzte, balore akritiko eta indibidualetan hezten gaituzte. Hauek dira euskal ikasleok kurtsoan zehar jasan behar izan ditugun zapalkuntzak, gure borondatearen aurkako estrategia inposatzaile zuzenarekin.

Honi aurre egiteko sortu genuen eskola ibiltaria, euskal ikasleok defendatzen eta behar dugun Euskal Eskola Nazionalaren proiektua praktikan jartzeko. Euskal Herria gure eskola dela aditzera emateko.

Ikasleoi kurtsoan zehar irakasten ez digutena ikasteko da eskola ibiltaria. Horretarako euskal herriko zonalde ezberdinak hautatzen ditugu, zuzeneko ezagutzaren bidez 3 egunez Euskal Herriko zonalde bat ikasteko aukera izateko. Bertako bitxikeriak, bizimoduak, arazoak eta historia ikasteko asmoarekin.

Era aske batean ikasi eta bizitzeko aukera izango dugu 3 egunetan zehar, klaseko lau paretetatik atera eta laguntasunean eta berdintasunean oinarritutako hezkuntza jasotzeko. Baloreek nota bat baino garrantzi handiagoa dutela aldarrikatzeko, eta beste eredu pedagogiko batean oinarrituta dagoen hezkuntza jasotzeko. 3 egun hauetan, ikasteaz ez ezik, era aske batean eta guk antolatutako aisialdian bizitzeko aukera izango dugu.

Eskola ibiltaria ikasleok udan dugun borrokarako bitartekoa dugu, kurtsoan zehar aldarrikatzen duguna errealitate bihurtzeko. Euskal ikasleria ezagutzarako beti dago prest, hori baitugu jakintza. Gu, gure alternatiba eraikitzeko gaude prest. Euskal Herria oinarri izanda, euskara hizkuntza, 3 egunetan zehar askatasunean eta berdintasunean bizi eta ikasteko aukera.

Eta aurten zer?

Aurten, web orriaren bitartez, Eskola Ibiltarira bertaratuko garenon iritzia eta nahia jakin nahi izan dugu, eta horretarako, ekarpen fase bat izan da apirilean hasi eta gaur arte. Bertan jasotako ideiak eta guk buruan geneukana uztartuta sortu da aurtengo Eskola Ibiltaria. Eskola Ibiltariaren 10.edizio honetan, Nafarroa aldera etorriko gara ikasleok. Hain zuzen ere, Lizarran hasi eta Arbizura arteko ibilaldia egingo dugu hiru egunetan zehar. Uztailaren 2, 3, eta 4ean. Lizarran hasi, eta Arbizura bitarte daude herri eta inguruak ezagutuko ditugu, Urbasa bera eta beraren txoko ezkutuenak ere igaroaz. Esan dugun moduan, urtero igarotzen ditugun zonaldeetan ikasteko daukaguna ikasten ahalegintzen gara eta aurten ere hala eginen dugu.

Orain bi urte martxan jarritako planteamenduari jarraiki, gai zentral baten inguruan antolatuko ditugu eskola gehienak, baina bestelako gaiek, eta unean-une irteten diren eztabaida, ikasgai eta tailerrek ere izango dute lekua Eskola Ibiltarian.

Lurraren ustiapena izango da aurtengo gai zentrala. Eta horri lotuta, honek ingurugiroan daukan eragina, gazteongan eta lurralde antolamenduarekin lotuta herri txikietan izaten ari den eragina eta sozio-ekonomia ikuspegitik daukan eragina aztertuko ditugu.

Baina ez dezagula Eskola Ibiltaria, eskola soil, zurrun eta edukiz jositako bat bezala ulertu. Edukiak landu, eta gure herriaren inguruko zertxobait gehiago ikasteaz gain, gu bezalako gazteak ezagutzeko balio baitu Eskola Ibiltariak. Ezagutza eta konfiantza lantzeko jolasekin, primeran pasatu ohi dugu eta, elkar ezagutzen.

Dena den, Eskola Ibiltaria zer den ondo jakiteko, egokiena, bertaratu eta esperientzia hau bizitzea izango da.

Nola eman izena?

Eskola Ibiltariko bonoak, 20 euro balioko ditu. Lehen egunean bertan ordainduko da. Bertan, azpiegitura beharra, (dutxak eta bestelakoak), eguneroko afariak, eta azken eguneko jaialdirako sarrera sartzen dira).

Izena emateko, IAren web orrian aukera izango da datorren astetik aurrera. ikasleabertzaleak.org helbidean.

Eta etorri nahi duen guztiari, izena emateko eskaera berezi bat egiten diogu, azpiegitura beharrak errazte aldera. Horretaz gain, autobusak ere irtengo dira herrialde desberdinetatik.